Sunnmøre kammermusikkfestival

Kulturskulane handplukkar no unge talent som skal spele på Sunnmøre kammermusikkfestival. 16 år gamle Sebastian Frøystad frå Fosnavåg er ein av dei.

HANDPLUKKA: Musikktalent Sebastian Kvalsvik Frøystad er valt ut til å spele på Sunnmøre Kammermusikkfestivalen saman med profesjonelle artistar.

Omkring handplukkar no kulturskulane lovande og vidarekomne musikkelevar som skal få moglegheit til å spele på konsertane saman med profesjonelle artistar. Pianist og fiolinist Sebastian Kvalsvik Frøystad er ein av desse elevane.
- Eg seier sjeldan nei til ein konsert. Eg liker å spele for eit publikum og gje dei glede gjennom musikken, seier 16 år gamle Sebastian.

Meisterklasser

Sunnmøre Kammermusikkfestival skil seg ut frå andre festivalar. Den har som klar målsetjing å bidra til vekst og utvikling for musikklivet i regionen. Artistane har ikkje berre forplikta seg til å spele på konsertane – dei har også forplikta seg til å gje minimum 90 minutt med undervising til utvalde talent frå kulturskulane omkring. Dette blir kalla meisterklasser. Dette skal Sebastian også vere med på.
- Dette er først og fremst ein stor inspirasjon for dei unge talenta. Eg trur verkeleg at dei vil lære mykje av dette. Det er eit heilt nytt konsept som ikkje har vore prøvd før, og eg trur musikarane har mykje å lære vekk og elevane har mykje å lære. Kammermusikk er noko av det edlaste ein finn. Eg har stor tru på dette, seier Robert Skeide som er rektor ved Herøy kulturskule.

Sebastian Kvalsvik Frøystad er valt ut til å spele på Sunnmøre Kammermusikkfestivalen saman med profesjonelle artistar.

Eit ungt talent

Sebastian har høge forventningar til den komande kammermusikkfestivalen. Han skal spele på den nest siste konserten under festivalen som skal vere i Herøy Frikyrkje i Fosnavåg.
- Eg gler meg. Eg trur verkeleg det blir kjekt og at ein vil få høyre mykje fin musikk, seier Sebastian.
Han har fleire gongar blitt omtalt som Herøy sitt største talent. Sebastian vann nyleg Ungdommens Kulturpris under Ungdommens Kulturmønstring, og øver meir enn fire timar aleine kvar dag. Mellom anna spelar han i Havella Spelemannslag og i eit lokalband med namn «Bird Talk». Sebastian har spelt fiolin sidan han var fem år gammal. Men det var først i 2001 han sette fingrane i pianoet.
-  Han har opptredt i massevis rundt omkring og stiller alltid opp. Han er eit av dei verkeleg store talenta våre. Han har eit stort repertoar å spele på, seier Skeide.

Vil leve av musikken

Sebastian fortel at han ønskjer å drive med musikk som yrke i framtida. Det er pianoet han i utgangspunktet ønskjer å leve av. Som førebilete har han mellom anna pianist Leif Ove Andsnes, sjølv om han gjerne høyrer på rock og pop.
- Eg øver nok mest på pianoet. Det er det eg kjenner eg meistrar og liker best. Musikk er mitt hovudtema. Det er ikkje noko anna eg kunne tenkt meg å drive med. Det er det eg liker best, fortel han.

Sunnmøre kammermusikkfestival vert arrangert for første gong 6.- 8. mai 2010. Bak den nye festivalen står Høgskulen i Volda og ei rekkje samarbeidspartnarar frå Søre Sunnmøre i nært samarbeid med fiolinisten Annar Follesø og pianisten Wolfgang Plagge.

Fortsett å lese ‘Programmet for Sunnmøre kammermusikkfestival 2010 er klart’

- Sunnmøre kammermusikkfestival er ei planlagt nyskapning og blir arrangert første gong 4. til 8. mai 2010. Bak festivalen står Høgskulen i Volda, Symfoniorkesteret, musikkskular i nært samarbeid med professor Wolfgang Plagge og fiolinisten Annar Follesø. Dei har fått med seg musikarar på topp internasjonalt nivå. Fortsett å lese ‘Sunnmøre kammermusikkfestival er etablert’